IndiaGK குடியுரிமை திருத்தச் சட்டம் என்றால் என்ன? மக்கள் எதிர்க்க காரணம் என்ன?

குடியுரிமை திருத்தச் சட்டம் என்றால் என்ன? 

மக்கள் எதிர்க்க காரணம் என்ன?

மத ரீதியிலான துன்புறுத்தலுக்கு உள்ளாகும் அண்டை நாட்டைச் சேர்ந்த அகதிகளுக்கு குடியுரிமை வழங்க இந்த மசோதா கொண்டு வரப்பட்டது என அரசால் இது நியாயப்படுத்தப்படுகிறது.

நாடு முழுவதும் கடந்த சில தினங்களாக குடியுரிமை திருத்தச் சட்ட விவகாரம் பற்றி எரிந்து கொண்டிருக்கிறது. 1955ஆம் ஆண்டு கொண்டு வரப்பட்ட குடியுரிமை சட்டத்தில் திருத்தம் செய்து குடியுரிமைச் சட்டத் திருத்த மசோதாவை கடந்த 2016ஆம் ஆண்டிலேயே பாஜக நிறைவேற்ற முனைப்பு காட்டியது.

ஆனால், மாநிலங்களவையில் போதிய பெரும்பன்மை இல்லாமை. கடந்த அரசின் பதவிக்காலம் முடிவு உள்ளிட்ட காரணங்களால் அப்போது அந்த மசோதா காலவதியாகி விட்டது. இதனைத் தொடர்ந்து, எதிர்க்கட்சிகளின் கடும் எதிர்ப்புகளுக்கு மத்தியில் குடியுரிமைச் சட்டத் திருத்த மசோதாவை மத்திய உள்துறை அமைச்சர் அமித் ஷா மக்களவையில் தாக்கல் செய்தார்.

மசோதாவுக்கு ஆதரவாக 334 உறுப்பினர்களும், எதிராக 106 உறுப்பினர்களும் வாக்களித்ததால் மக்களவையில் நிறைவேறிய குடியுரிமைச் சட்டத் திருத்த மசோதா மாநிலங்களவையில் தாக்கல் செய்யப்பட்டது. அங்கு மசோதாவுக்கு ஆதராக 125 உறுப்பினர்களும், எதிராக 105 உறுப்பினர்களும் வாக்களித்தனர். இரு அவைகளிலும் நிறைவேறிய மசோதா குடியரசுத் தலைவரின் ஒப்புதலுக்கு பின்னர் சட்டமாகியுள்ளது.

குடியுரிமை திருத்தச் சட்டத்தில் இடம்பெற்றுள்ள அம்சங்கள்

• கடந்த 2014ஆம் ஆண்டு டிசம்பர் 31ஆம் தேதிக்கு முன்பு பாகிஸ்தான், வங்கதேசம், ஆஃப்கானிஸ்தான் ஆகிய நாடுகளிலிருந்து இந்தியாவில் குடியேறிய இஸ்லாமியர்கள் அல்லாத இந்துக்கள், சீக்கியர்கள், ஜைனர்கள், பார்ஸிகள், கிறிஸ்தவர்கள், புத்த மதத்தைச் சேர்ந்தவர்கள் ஆகியோர் சட்ட விரோதமாகக் குடியேறியவர்களாகக் கருதப்பட மாட்டார்கள்.
• 
  
• இந்தியாவில் அவர்கள் குடியேறிய 5 ஆண்டுகளில் அவர்களுக்கு இந்தியக் குடியுரிமை வழங்க மசோதாவில் வழிவகை செய்யப்பட்டுள்ளது. இதற்கு முன்பு அது 11 ஆண்டுகளாஅ இருந்தது.
• 
  
• இந்தச் சட்டப்படி போதிய ஆவணம் இல்லை என்றாலும் குடியுரிமைக்கு விண்ணப்பிக்கலாம் எனத் தெரிவிக்கப்பட்டுள்ளது.
• 
  
• குடியுரிமை அளிக்கப்படுபவர்களுக்கு அவர்கள் மீது ஏற்கனவே தொடரப்பட்டுள்ள சட்ட விரோதமாக குடியேறியதற்கான வழக்குகளிலிருந்து சட்டப் பாதுகாப்பு அளிக்கப்படும்.
• 
  
• அரசியலமைப்பின் 6ஆவது அட்டவணையில் சேர்க்கப்பட்டுள்ள அசாம், மிசோரம், மேகாலயா, திரிபுரா மாநிலங்களில் உள்ள குறிப்பிட்ட பழங்குடியினப் பகுதிகளுக்கு இதிலிருந்து விலக்கு அளிக்கப்பட்டுள்ளது.
• 
  
• எல்லைப்புற ஒழுங்குமுறை ஒப்பந்தத்துக்கு உட்பட்ட அருணாசலப் பிரதேசம், நாகாலாந்து, மிசோரம் பகுதிகளைச் சேர்ந்தவர்களாகவும் இருக்கக் கூடாது எனவும் கூறப்பட்டுள்ளது.

குடியுரிமை திருத்தச் சட்டத்துக்கு எதிர்ப்பு ஏன்?

இந்த சட்டத்துக்கு இரண்டு தனித்துவ காரணங்களால் எதிர்ப்புகள் வலுத்து வருகிறது. வடகிழக்கு மாநிலங்களில் வாழும் பூர்வீக குடிமக்கள் தங்களது பெரும்பான்மைக்கும், பாரம்பரியத்துக்கும் ஆபத்து வந்துவிடும் என அஞ்சுவதால் அப்பகுதி மக்கள் போராட்டத்தில் ஈடுபட்டுள்ளனர்.

அதேபோல், இஸ்லாமியர்கள் தவிர்த்துப் பிற மதத்தினருக்கு மட்டும் ஆதரவாக இருப்பதால் நாட்டின் மற்ற பகுதிகளில் போராட்டம் தீவிரமடைந்துள்ளது. தமிழகத்தை பொறுத்தவரை , இலங்கையில் இருந்து அகதிகளாக வந்த தமிழர்கள் விடுபட்டுள்ளததையும், இஸ்லாமியர்கள் சேர்க்கப்படாததையும் கண்டித்து போராட்டங்கள் வலுவடைந்துள்ளன.

மத ரீதியிலான துன்புறுத்தலுக்கு உள்ளாகும் அண்டை நாட்டைச் சேர்ந்த அகதிகளுக்கு குடியுரிமை வழங்க இந்த மசோதா கொண்டு வரப்பட்டது என அரசால் இது நியாயப்படுத்தப்படுகிறது. அப்படியென்றால் மியான்மரிலிருந்து வந்த ரோஹிங்கியா இஸ்லாமியர்கள், பாகிஸ்தானில் துன்புறுத்தலுக்கு உள்ளாக்கப்படும் அகமதியா இஸ்லாமியர்கள் ஏன் கவனத்தில் கொள்ளப்படவில்லை எனப் பலரும் கண்டனங்களைப் பதிவிட்டுவருகின்றனர்.

தமிழகத்தின் 24 மாவட்டத்தில் 107 முகாமில் இலங்கையில் இருந்து வந்த அகதிகள் 59716 பேர் இருக்கிறார்கள் 30 ஆண்டுகளுக்கு மேலாக இருக்கிறார்கள், இங்கேயே பிறந்து வளர்ந்தவர்கள் இருக்கிறார்கள் அவர்களைப் பற்றியெல்லாம் கண்டுகொள்ளப்படவில்லை என விமர்சிக்கப்படுகிறது.