பேரழிவும் போராட்டமும் நிறைந்த சர்வதேச முக்கிய நிகழ்வுகள் 2019

பேரழிவும் போராட்டமும் நிறைந்த சர்வதேச முக்கிய நிகழ்வுகள்

இலங்கையில் ஈஸ்டர் பண்டிகை நாளில் தற்கொலை குண்டு வெடிப்புகள் நிகழ்ந்தன.

பிரிட்டன் தேர்தலில் போரிஸ் ஜான்சன் வெற்றி பெற்று மீண்டும் பிரதமரானார்.

போப் பிரான்சிஸ் அரேபிய தீபகற்ப பயணம், ரஷ்யா – அமெரிக்கா இடையே அணு ஆயுத ஒப்பந்தம் முறிவு, இலங்கை மற்றும் நியூசிலாந்து நடைபெற்ற பயங்கரவாதத் தாக்குதல்கள், அமேசான் காட்டுத்தீ உள்ளிட்ட பல முக்கிய நிகழ்வுகள் 2019ஆம் ஆண்டில் நிகழ்ந்துள்ளன.

2019ஆம் ஆண்டுக்கு விடைகொடுக்கும் தருணத்தில் இந்த ஆண்டில் நடந்த உலகளாவிய முக்கிய நிகழ்வுகளை நினைவூட்டுகிறது இத்தொகுப்பு.
1. நிலவின் மறுபக்கத்தில் சீனா

நிலவை ஆய்வு செய்வதற்காக லாங் மார்ச்-3பி என்ற ராக்கெட் மூலம் சீனா ஏவிய சாங்’இ-4 செயற்கைக்கோள், நிலவின் மறுபக்கத்தில் ஜனவரி 3ஆம் தேதி காலை 10. 26 மணிக்கு வெற்றிகரமாக தரையிறக்கப்பட்டது.

2. கருப்புப் பட்டியலில் ஹூவாய்

ஹூவாய் நிறுவன தலைமை அதிகாரி மெங் வான்ட்சொவை கனடா அரசு ஜனவரி 28ஆம் தேதி கைது செய்தது. அமெரிக்காவின் அறிவுறுத்தலால் அவர் கைது செய்யப்பட்டார். இதைத் தொடர்ந்து ஹூவாய் நிறுவனத்தை அமெரிக்கா கறுப்பு பட்டியலில் (Black List) சேர்த்தது.
3. அமீரகத்தில் போப் பிரான்சிஸ்

போப் பிரான்சிஸ் பிப்ரவரி 3ஆம் தேதி ஐக்கிய அரபு அமீரகத்துக்குச் சென்றார். இதன் மூலம் அரேபிய தீபகற்பத்துக்குச் சென்ற முதல் போப் என்ற பெருமையைப் பெற்றார். அபுதாபியில் அரசர் ஷேக் முகம்மது பின் சையத் அல் நஹ்யானைச் சந்தித்தார். போப் பங்கேற்ற கூட்டத்தில் ஒரு லட்சத்துக்கும் மேற்பட்டோர் கலந்துகொண்டனர். கூட்டத்தில் போப் பேசும்போது, ஏமன் போர் குறித்த கவலையை வெளிப்படுத்தினார்.

4. டிரம்ப் - கிம் இரண்டாவது சந்திப்பு

அமெரிக்க அதிபர் டொனால்டு டிரம்ப் மற்றும் வட கொரிய அதிபர் கிம் ஜாங் உன் இடையேயான இருநாள் சந்திப்பு பிப்ரவரி 27, 28 ஆகிய நாட்களில் வியட்நாமின் ஹனோய் நகரில் நடைபெற்றது. இரண்டாம் நாளில் வட கொரியாவின் கோரிக்கைகளை ட்ரம்ப் முழுமையாக நிராகரித்து கூட்டத்திலிருந்து வெளியேறினார்.

5. நியூசிலாந்து துப்பாக்கிச்சூடு

நியூசிலாந்தின் கிரைஸ்ட்சர்ச் நகரில் உள்ள மசூதியில் நடத்தப்பட்ட துப்பாக்கிச் சூட்டில் 50 பேர் உயிரிழந்தனர். நியூசிலாந்தில் முதல் முறையாக பயங்கரவாத குற்றச்சாட்டாக இது கருதப்படுகிறது.

6. பாரிஸ் தேவாலயத்தில் தீ

பிரான்ஸ் நாட்டின் பாரிஸ் நகரில் 850 ஆண்டுகள் பழமையான நோட்ரடாம் தேவாலயத்தில் மாபெரும் தீ விபத்து ஏற்பட்டது. இதில் தேவாலயக் கூரையும் சுவர்களும் இடந்து விழுந்து கடுமையான சேதம் ஏற்பட்டது. நூற்றுக்கணக்கான தீயணைப்பு வீரர்கள் இணைந்து 15 மணிநேரம் போராட்டத்துக்குப் பின் தீயைக் கட்டுப்படுத்தினர். அதிர்ஷ்டவசமாக, இரு பெரிய மணிக்கூண்டுகளுடன் கூடிய கோபுரங்கள் சேதமின்றி தப்பிவிட்டன.

ஈராக், சிரியாவில் 5 இடங்களில் அமெரிக்க ராணுவம் தாக்குதல்

7. இலங்கையில் ஈஸ்டர் குண்டுவெடிப்பு

இலங்கையில் ஏப்ரல் 21ஆம் தேதி ஈஸ்டர் பண்டிகை நாளில் மூன்று கிறிஸ்தவ தேவாலயங்கள் மற்றும் மூன்று நட்சத்திர ஹோட்டல்களில் தற்கொலை குண்டு வெடிப்புகள் நிகழ்த்தப்பட்டன. 250க்கும் மேற்பட்டவர்கள் கொல்லப்பட்டனர். 500 பேருக்கும் மேற்பட்டவர்கள் காயமுற்றனர்.

8. புதிய தாய்லாந்து மன்னர்

தாய்லாந்து நாட்டின் மன்னராக 66 வயதாகும் மகா வஜ்ரலாங்கோர்ன் மணிமுடி சூடினார். முடிசூட்டு விழா மூன்று நாட்கள் நடைபெற்றது. பல ஆண்டுகளாக மன்னராக இருந்த பூமிபோன் அடூன்யடேட் 2016ஆம் ஆண்டு மரணம் அடைந்தார்.

9. சவுதி அராம்கோ தாக்குதல்

சவுதி அரேபியாவில் மே 12ஆம் தேதி சுவுதி அராம்கோ நிறுவனத்தின் இரண்டு எண்ணெய் சுத்திகரிப்பு ஆலைகள் குண்டுவீசித் தாக்கப்பட்டன. இந்தத் தாக்குதலுக்குக் காரணம் ஈரான் என அமெரிக்கா குற்றஞ்சாட்டியது. இதைத் தொடர்ந்து சவுதியில் பிராந்தியத்தில் அமெரிக்கா கூடுதல் படையை அனுப்பியது.

ஆப்கனில் 10 நாட்கள் போரை நிறுத்த தாலிபன் சம்மதம்

10. ஹாங்காங் போராட்டம்

ஹாங்காங்கில் சந்தேகிக்கப்படும் நபர்களை சீனாவிடம் ஒப்படைக்க வழிவகுக்கும் சட்ட மசோதாவுக்கு எதிராக ஹாங்காங் மக்கள் போராட்டம் தொடங்கியது. இப்போராட்டத்தில் பல லட்சம் பொதுமக்கள் திரண்டனர்.

11. அமெரிக்கா – ரஷ்யா ஆணு ஆயுத ஒப்பந்தம்

அமெரிக்கா – ரஷ்யா இடையே போடப்பட்ட அணு ஆயுத ஒப்பந்தத்திலிருந்து அமெரிக்கா விலகியது. மத்திய தொலைவு அணு ஆயுத ஒப்பந்தம் எனப்படும் இந்த ஒப்பந்தம் 1987ஆம் ஆண்டு அப்போதைய அமெரிக்க அதிபர் ரொனால்டு ரீகன் மற்றும் சோவியத் யூனியன் தலைவர் மிக்கைல் கொர்பச்சோவ் இடையே கையெழுத்தானது. இந்த ஒப்பந்தத்தின் படி, 500 கி.மீ. முதல் 5,500 கி.மீ தொலைவு வரை சென்று தாக்கும் ஏவுகணை பயன்படுத்துவதில்லை என இரு நாடுகளும் முடிவு செய்திருந்தன.

சீனாவில் பாலியல் குற்றவாளிகளுக்கான தண்டனையில் திருத்தம்

12. அமேசான் காட்டுத்தீ

பிரேசில் நாட்டில் உள்ள அமேசான் காட்டில் ஆகஸ்ட் 21ஆம் தேதி காட்டுத்தீ மூண்டது. வேகமாகப் பரவி மழைக்காட்டின் பெரும் பகுதியை நாசம் செய்த இந்தக் காட்டுத்தீ உலக அளவில் சுற்றுச்சூழல் பாதுகாப்பு மீது கவனத்தைத் திருப்பியது.

13. பருவநிலை மாற்றத்துக்கு எதிரான போராட்டம்

ஸ்வீடனைச் சேர்ந்த 16 வயது சிறுமி கிரெட்டா துன்பெர்க் முன்னெடுத்த பருவநிலை மாற்றத்தைத் தடுப்பதற்கான போராட்டம் உலக அளவில் லட்சக்கணக்கான மாணவர்களை போராடத் தூண்டியது. செப்டம்பர் 27ஆம் தேதி கனடாவில் நடைபெற்ற போராட்டத்தில் சுமார் 5 லட்சம் மாணவர்கள் கலந்துகொண்டனர்.

இனப்பெருக்கம் செய்யாமல் நீண்ட ஆயுள் பெற்ற காண்டாமிருகம்

14. டொனால்ட் ட்ரம்ப் பதவி நீக்கத் தீர்மானம்

அமெரிக்க அதிபர் டொனால்ட் ட்ரம்ப்பை அதிகாரத்தைத் தவறாக பயன்படுத்திய குற்றத்துக்காக பதவி நீக்கம் செய்யும் தீர்மானம் அந்நாட்டு நாடாளுமன்றத்தின் பிரதிநிதிகள் சபையில் நிறைவேற்றப்பட்டது. அதிகாரத்தை தவறாக பயன்படுத்தியது, அமெரிக்கக் காங்கிரஸ் நடைபெற விடாமல் இடையூறு ஏற்படுத்தியது ஆகிய குற்றச்சாட்டுகளின் பேரில் இத்தீர்மானம் கொண்டுவரப்பட்டது.

15. பிரிட்டன் தேர்தல் – போரிஸ் ஜான்சன் வெற்றி

பிரிட்டன் பொதுத் தேர்தலில் கன்செர்வேடிவ் கட்சியின் பெரும்பான்மையுடன் வெற்றி பெற்றது. அந்தக் கட்சியின் போரிஸ் ஜான்சன் மீண்டும் பிரதமராகப் பதவியேற்றார். இந்திய வம்சாவளியைச் சேர்ந்த 15 பேர் எம்.பி.க்களாக தேர்வு செய்யப்பட்டனர்.